"Negra sombra"

Cando penso que te fuches, negra sombra que me asombras, ó pé dos meus cabezales tornas facéndome mofa. Cando maxino que es ida, no mesmo sol te me amostras, e eres a estrela que brila, e eres o vento que zoa. Si cantan, es ti que cantas, si choran, es ti que choras, e es o marmurio do río e es a noite e es a aurora. En todo estás e ti es todo, pra min e en min mesma moras, nin me abandonarás nunca, sombra que sempre me asombras.